ផ្ទុះការតវ៉ាប្រជាពលរដ្ឋជាម្ចាស់រថយន្តដឹកទំនិញប្រមាណជាង ២០០ នាក់ស្នើបញ្ចុះតម្លៃពន្ធរថយន្ត
02-August-2016 | ដោយ មែន កំសត់
កំពង់ចាម៖ប្រជាពលរដ្ឋជាម្ចាស់រថយន្តដឹកទំនិញប្រមាណជាង ២០០ នាក់បានមកប្រជុំគ្នានៅខាងមុខសាលាខេត្តកំពង់ចាមនាព្រឹកថ្ងៃទី ០១ ខែសីហា ដើម្បីដាក់សំណើ និង សំណូមពរតាមរយ:អភិបាលខេត្តនេះឲ្យជួយពាំនាំទៅកាន់ក្រសួងសេដ្ឋកិច្ច និង ហិរញ្ញវត្ថុ ជាពិសេសសម្តេចតេជោប្រមុខរាជរដ្ឋាភិបាលនៃព្រះរាជាណាចក្រកម្ពុជាសូម សម្តេចមេត្តាជួយរក្សាការបង់ពន្ធមធ្យោបាយដឹកជញ្ជួនទូទៅ ឲ្យបាននៅតម្លៃដូចមុនដដែល។
គួរបញ្ជាក់ថាកាលពីថ្ងៃទី១៦ ខែមិថុនាឆ្នាំ២០១៦កន្លងទៅនេះក្រសួងសេដ្ឋកិច្ចនិងហិរញ្ញវត្ថុបានចេញ ប្រកាសការកំណត់ប្រាក់ពន្ធតាមប្រភេទមធ្យោបាយដឹកជញ្ជូន ក្រៅពីរថយន្តទេសចរណ៍ គឺកែប្រែតម្លៃប្រាក់ពន្ធប្រចាំឆ្នាំថ្មី។ ក្នុងនោះសម្រាប់រថយន្តដឹកទំនិញគ្រប់ប្រភេទ ពោលគឺរថយន្តដឹកទំនិញចំណុះភ្លៅបីឡើងទៅភ្លៅប្រាំ និង រ៉ឺម៉កសណ្តោងបង់ពន្ធច្រើនជាងឆ្នាំកន្លងទៅក្នុងបរិមាណខ្ពស់ណាស់។
លោកហុងគ្រីជាម្ចាស់រថយន្តចំណុះភ្លៅ៤មកពីភូមិបុសខ្នុរឃុំ បុសខ្នុរស្រុកចម្ការលើបានមកចូលរួមសុំបញ្ចុះតម្លៃបង់ពន្ធផ្លូវ ប្រចាំឆ្នាំនោះជាមួយម្ចាស់រថយន្តផ្សេងទៀតប្រហែលជាង២០០នាក់បាន ប្រាប់រស្មីកម្ពុជាតាមទូរស័ព្ទថាអ្នកទាំងអស់ជាម្ចាស់រថយន្ត ដឹកទំនិញដែលបញ្ហាដូចគ្នាមកពីស្រុកចម្ការលើស្រុកព្រៃឈរ ខេត្តកំពង់ចាម។
មួយចំនួនមកពីស្រុកត្បូងឃ្មុំស្រុកអូរាំង ឪខេត្តត្បូងឃ្មុំនិងមួយចំនួនទៀតមកពីខេត្តព្រៃវែងគឺមកសុំឲ្យ អភិបាលខេត្តកំពង់ចាមពាំនាំសំណើទៅកាន់លោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។សំខាន់គឺសម្តេចអគ្គមហាសេនាបតីតេជោ ហ៊ុន សែន សូមសម្តេចមេត្តាជួយឲ្យតម្លៃបង់ពន្ធផ្លូវ ឬពន្ធមធ្យោបាយសម្រាប់រថយន្តចំណុះភ្លៅបីដល់ភ្លៅប្រាំ ឬរថយន្តរ៉ឺម៉កសណ្តោងនៅរក្សាតម្លៃបង់ពន្ធដដែល ឬឡើងក្នុងកម្រិតសមរម្យល្មមបានហើយ។
ប្រភពព័ត៌មាននោះបាន ឲ្យដឹងទៀតថា ក្នុងនោះបើបង់ប្រាក់ពន្ធថ្មីតាមកម្រិតរបស់ក្រសួងសេដ្ឋកិច្ច និង ហិរញ្ញវត្ថុបានប្រកាសនោះ គឺសម្រាប់រថយន្តរបស់លោកចំណុះភ្លៅបួនដែលរាល់ឆ្នាំបង់ ៧៥ម៉ឺនរៀលត្រូវបង់ដល់ទៅជាងពីរលានរៀល។ មានន័យថា ត្រូវបង់តម្លៃចាស់មួយគុណបី គឺពិបាកទ្រាំទ្ររ៉ារងខ្លាំងណាស់ ណាមួយនៅរកប្រាក់បង់ពន្ធប្រចាំខែ និង បង់ប៉ាតង់ទៀតផង។
មន្ត្រីសាលាខេត្តកំពង់ចាមបានហៅតំណាងម្ចាស់រថយន្តជាអ្នកតវ៉ាចំនួន បីនាក់ដើម្បីជាជួបប្រជុំជាមួយអភិបាលខេត្ត និង មន្ត្រីពន្ធដារ រយ:ពេលប្រមាណមួយម៉ោងក៏បានចេញមកវិញផ្តល់បទសម្ភាសន៍ដល់អ្នក កាសែតដែលនៅរង់ចាំខាងក្រៅរបងថា លោក លន់ លឹមថៃ ជាអភិបាលខេត្តនេះបានទទួលយកសំណើរបស់ពួកគាត់ហើយ ដើម្បីពាំនាំទៅដាក់ជូនសម្តេចតេជោ និង រដ្ឋមន្ត្រីក្រសួងសេដ្ឋកិច្ចនិង ហិរញ្ញវត្ថុ ហើយបានរំសាយការជួបជុំទៅកាន់លំនៅស្ថានរៀងៗខ្លួន៕
ចំនួនអ្នកទស្សនា
- ថ្ងៃនេះ11051
- ម្សិលមិញ6261
- សប្តាហ៍នេះ29431
- ខែនេះ144581
- ឆ្នាំនេះ144581
- សរុប20587037